المقدمة:

أول ما بديت أهتم بالـ JRPG العنوان هذا يتكرر قدامي وما عندي مشكلة ألعب الألعاب قديمة بالمحاكي بس دائمًا أتهرب منها صراحة والسبب جملة إنه 108 شخصية قابلة للعب . وبعد ما بديت عرفت ليه محبوبة رغم بعض الأشياء المزعجة فيها .

بصريًا:

نسخة الريماستر ممتازة جدًا تبي زيادة شوف الفيديو https://www.youtube.com/watch?v=6YpEsDiEhl0

تصاميم الشخصيات مميزة وجميلة، فتتذكرهم وأنت تلعب. نصيحة: لا تأخذ بريك طويل، لأن بعض الأماكن كبيرة وراح تضيع فيها.

القيم بلاي وشوي هذرة:

بما أنه الـ DNA نفس الشيء باللعبتين فراح أعاملهم كلعبة وحدة بعدها أوضح الفرق. مثل أي لعبة من التصنيف أنت راح تقاتل + راندوم إنكاونتر، عندك 6 شخصيات بنظام صف أمامي وخلفي.

هل أرفع اللفل وخلاص يكفي عشان تفوز بالقتالات؟ ممكن إلى حد ما إلا ضد البوسات صراحة لازم تبدع لأنه في عندك 6 شخصيات، ونوعهم (قريب - وسط - بعيد).

Unite Attacks

عندك حركة الـ Unite Attacks؛ إذا حطيت شخصيات بينهم علاقة بالقصة مع بعض بالبارتي، يفتحون لك ضربات مشتركة ثنائية أو ثلاثية قوية وأشكالها تونس.

Runes

وعندك شيء اسمه runes نفس السحر والمهارات بمكان واحد ولازم تركب عليه شيء اسمه orb، فحرية تشكيل الشخصيات عندك كبيرة، بس هذه الحرية تجي على شكل إيجابي وسلبي لأنه نتكلم عن 108 شخصية

تطوير الشخصيات والأسلحة:

فوضعك وأنت تمشي القصة راح تصرف وقت وفلوس بالهبل على تلبيس وتطوير الشخصيات، خصوصاً سالفة الأسلحة؛ ما تشتري سيف جديد، بل سلاح الشخصية ثابت معك ولازم تطوره وتصقله لفل ورا لفل عند الحداد! وللأسف الـ QOL غير كافي إنه يحل التعب هذا مع كثرة الشخصيات. (راح أتكلم عن تجميع الشخصيات بقسم خاص)

وعندك أسلوب قتال بس يطلع مع القصة وقليل بس مميز .

Duels:

قائد ضد قائد وحلو صراحة لازم تتوقع هجمة العدو من كلامه.

Major Battles:

بالجزء الأول مبسّط وقريب لحجرة ورقة مقص. بالجزء الثاني صار قريب من Fire Emblem وغثيث وطويل :) وأكرهه صراحة.

تجميع الشخصيات:

رحلة ممتعة ومرهقة وقاهرة (وهل أحتاج دليل وأنا ألعب أم لا)

تبي النهاية الحقيقية؟ جمع الكل = بكل بساطة... مع بعض القرارات المفخخة اللي ممكن تخرب كل شيء.

الأول سهل نوعًا ما بس راح تتعب وأنت تحوس ولكن مقدور عليه , الثاني للأسف الشروط فيها أفخاخ واجد لدرجة أني استسلمت وكملت طبيعي .(شفت النهايات الثانية يوتيوب)

التجميع ممتع جدًا، من تكلم NPC وله صورة يعني هذا الشخص قابل للانضمام، بس حقق الشروط. وبعضهم ينضمون مع القصة.

ف عادي توقف القصة وتحاول تضم شخص، ولكل شخص شرط معين؛ مثل لازم إنك قوي، أو إنك هربت من المعركة 50 مرة، عندك ITEM معين وهكذا.

بس العبط يبدأ لما واحد لازم تروح عند شجرة معينة وتضغط عندها X ثلاث مرات بعدين يطلع، وواحد ما يطلع إلا عشوائي بالفندق فعادي أنت مريت أكثر من مرة وما شفته، وواحد لازم تجيب معاك 4 أشخاص وتروح له درب طويل.

القلعة

لما تسألني شنو المكافأة من تجميع الشخصيات غير زيادة قوتك؟ اهني نجي لقلعتك الخاصة.

القلعة مو بس مكان ترجع له بين الأحداث. كل ما تجمع شخصيات أكثر، تكبر وتتطور وتفتح لك خدمات جديدة: حداد، محلات، تخزين، ميني قيمز وأشياء جانبية. وحتى التنقل السريع تفتحه عن طريق شخصية تنضم لك، ويوفر عليك وقت واجد مع كبر العالم وكثرة الرجعة بين المدن.

الحلو إن مو كل شخص تجمعه يكون مقاتل؛ بعضهم فايدته الحقيقية داخل القلعة. ومن أكثر الأشياء اللي عجبتني إني كل ما أرجع أشوف الشخصيات اللي جمعتهم موزعين فيها. تحس إن المكان قاعد يعيش ويكبر معاك، وهذا خلاني أفكر كل ما أضم شخصية جديدة: شنو راح تضيف للقلعة؟

بس الموضوع مو خالي من الإزعاج. اللعبة أحيانًا تجبرك ترجع للقلعة عشان تبدل شخصيات أو تستخدم خدمة معينة، وقبل ما تفتح التنقل السريع يصير فيها لف ودوران. والقلعة في الجزء الثاني كبيرة حيل، فاحفظ دروبها عدل؛ الخريطة اللي تحت تعطيك فكرة عن حجمها.

مع هذا كله، القلعة من أحسن أفكار اللعبة عندي. هي اللي تخلي تجميع الـ108 شخصيات له نتيجة تشوفها قدامك، مو مجرد رقم يزيد بالقائمة.

القصة

وهذا أهم شي عندي إذا لعبت أي لعبة من التصنيف.

الجزء الأول

الجزء الأول يبدأ بأسلوب بسيط ومباشر ما يطول وتدش على طول بالأحداث وتمشي معاك شوي شوي مافيه تمطيط أو ثقل صراحة .

في شخصيات راح تجمعها بالجزء هذا ترجع بالجزء بالثاني فركز وأنت تلعب .

بس البساطة ما تعني شي سيء بالعكس في أحداث بالجزء هذا مؤلمة و صادمة و مو مكتوبة عشان تخليك حزين ودراما بالعكس تسلسل طبيعي و القصة أغلبها عن البطل بدون تشتت وكان هذا شي ممتاز . في duel ماراح تنساه .

غير ذلك قصص الشخصيات الجانبية الي تجمعها يعطيك متعة وراحة شوي .

الجزء الثاني

أعشق الغلاف بقوة

الجزء الأول والثاني الثيم مالهم عسكري سياسي.

الثاني يأخذ الشيء هذا لمرحلة أكبر ويكبر كل شيء معاه. بطل جديد بارتي جديد مع عودة بعض الشخصيات من الجزء الأول ويلعبون دور مهم مو بس فان سيرفس.

تبدأ أنت وصديق الطفولة كجنود عاديين ، شوي شوي تتعرف على الشخصيات وتأخذ وقت على ما تدش جو مع اللعبة. وعندكم صديقة اسمها نانامي بعد .

الجزء هذا أعمق من الأول وتفاصيله واجد راح تعيش تاريخ كامل ودول وحرب وبنفس الوقت تتعرف على الشخصيات شوي شوي، فهذا أشوفه من عيوب اللعبة إنه فيها قسم بالنص تحس البطل صار سايق توصيل للأحداث ما عنده شيء يذكر بس الربع الأخير وكشف الأسرار روعة جداً. يعني حط ببالك حول 40 ساعة لعب وما تسوي كل شيء بعد (الأول بحدود 20 ساعة).

الجزء هذا يتميز بعدم الرحمة صراحة كمية أحداث تصير فيه تصدم والأشرار أو بالأخص الشرير يغث ويقهر و في شخصية ثانية راح تخليك تقول ليه.

الي يميز الجزء هذا إنه النهاية الأصلية (في 4) جدًا ممتازة ومرضية .

بس حتى الباقيين حلوين . و الشروط للأسف متعبة.

طبعًا اللعبة بالقصة الأساسية ثقيلة جدًا فلازم تأخذ راحة و تسوي الأشياء الجانبية .

الريماستر والـ QOL

الريماستر بصريًا ممتاز مثل ما قلت، وعنده إضافات تساعد مثل تسريع القتال والـ Auto Battle وهذا شي مهم جدًا بلعبة فيها Random Encounters واجد.

تبديل وتجهيز الشخصيات، تطوير الأسلحة، نقل الأغراض والرونات بين الشخصيات، كل هذا يأخذ وقت أكثر من اللازم. ومع أن فيه تحسينات تساعدك، للحين كنت أتمنى QOL أكبر يناسب عدد الشخصيات الموجود.

الإيجابيات والسلبيات

الإيجابيات

• القصة حلوة وبسيطة وسهل تدمج فيها و تخلص وأنت راضي على الرحلة .

• تجميع الشخصيات ممتع وله فائدة ( يعطي السلسلة تميز)

• نظام القلعة وتطورها معاك.

• تصاميم الشخصيات مميزة وسهل تتذكر أغلبهم.

• الريماستر بصريًا جميل ومحترم للأصل.

السلبيات

• الـ QOL ما يكفي مع 108 شخصية.

• تطوير وتجهيز الشخصيات يأكل وقت وفلوس.

• بعض شروط التجنيد عبيطة ومستحيل تعرفها من نفسك.

• إذا تبي النهاية الحقيقية لازم قايد والشي يخرب التجربة ويقتل عنصر الاستكشاف.

• الجزء الثاني يعاني بكذا مكان بتمطيط ويكسر الرتم.

• الـ Major Battles بالجزء الثاني غثيثة وطويلة وممكن شخصية تموت منك وتروح عليك النهاية الأصلية فإذا تبي تعيد راح يأخذ وقت أكثر .

• بعض القرارات ممكن تخرب عليك أشياء مهمة وأنت مو داري.

• تغيير البارتي مرات يصير تعب بدل ما يكون متعة.

نصائح للمتعة الكاملة

الجزء الأول تقدر تلعبه طبيعي وتعيش فيه و ماراح يجيك شعور احتراق ف خله تدريب حق الجزء الثاني وافهم النظام .

العب طبيعي و لا تصير مهووس بالنهاية الأصلية لأنه راح يتعبك كثرة التنقل بس عشان تحصل عضو واحد تضمه , غير ذلك لا تخلي عندك أغراض زايدة وبيع أول بأول .

اللعبة مو صعبة إلا قدام البوسات وحضّر صح اتعب لك على كذا شخصية عشان ترتاح بدال لا توزع جهدك على 108 + في ميني قيمز بالقلعة عندك ف استمتع فيهم بعد

في أشياء تجمعها حق NPC وتعطيهم بالقلعة ويغير شكل كذا شي ف هذه متعة بعد

الجزء الثاني شوي راح يكون أطول و لا تأخذ بريك طويلة لأنه متروس معلومات وشخصيات و راح يكافئك إذا ركزت ,

جمع شخصيات كثر ما تقدر حتى لو ما تبي النهاية الأصلية لأنه بروحه هذه لعبة .

الخاتمة:
هل أنصح باللعبة نعم إذا تحب التصنيف وتتحمل بعض الأمور المزعجة فيه , بالأخير أنت ماراح تطلع بشي مكرر صراحة وفي أحداث حلوة حيل ببالك , وبما إن أنمي الجزء الثاني يبدأ في 3 أكتوبر 2026 ما أدري عن جودة الاقتباس بس خلاص وصلت مرحلة إنه راح تنحرق عليك اللعبة :) .